The wanruly fowk

Ah waant tae be wi the wanruly fowk
wha leev, lauch an renunce conformitie
an pit it whaur it belangs –
elsewhaur.

Aw tae be wi the bowsterous,
capernoitit fowk
unwrocht unwuiven –
appen

beek in the glowe
o thaur hocken bards'
herts –

herts thit can an dae
devoor hail
existences.

Ah crave tae be wi the wanruly fowk
wi the camsteirious makars –
thae glaumshach guzzlers
o eternities

for Ah ween that
Ah hae becam
...................fushionless

an aye awa
...................oan ma lane.

-Joe Murray © 2020